«ЖАҢАҚОРҒАН» ШИПАЖАЙЫНДА
Құшағын қонақтарға жайып тұрған,
Баурында қыз-бозбала сауық құрған.
Шипажай «Жаңақорған» салынғалы,
Қаншама сырқат жанды айықтырған.
Көргенде жұрттың ыстық ықыласын,
Киелі өлке екенін ұғынасың.
Суың да, балшығыңда қасиетті,
Төккен бе Алла нұрлы шұғыласын.
Тигізбес тұлпар қамшы сауырына,
Текті ер шыдар тағдыр дауылына.
Ғажайып ғимараттар салып жатқан,
Ризамыз Аманкелді бауырыма.
Жайғасса жақсы, жайсаң төріңе егер,
Жалғасқан ата дәстүр, өнеге дер.
Аузынан алты алаштың алғыс алып,
Атақ-даңқ, қуанышқа бөлене бер!
Таусылып бойындағы қайрат-жігер,
Дертіне ем таппаған жадап жүдер.
Келгенде үміт артып шипажайға,
Жыртығын денсаулықтың жамап жібер.
Халқының ертеңіне сенетұғын,
Қиямет қиындықты жеңетұғын.
Айналдым, жігіттерден арманы асыл,
Жаннатқа туған жерді теңейтұғын!..
Достарыңызбен бөлісу: |
