Қарттардың үмітін сөндіріп алмайық! «Жас Отан» мүшелерінің ұраны осындай Қазан айының бірінен бастап, бүкіл Қазақстан бойынша зейнеткерлерге, соғыс ардагерлері мен мүгедектерге жан-жақты жәрдем көрсету мақсатында ұйымдастырылған «Менің қарттарым» атты республикалық жастар әлеуметтік акциясы өтіп жатыр. Оны өткізуші – «Отан» республикалық саяси партиясының «Жас Отан» жастар қанатының мүшелері. Аталмыш акция бірнеше кезеңдерден тұрады. Атап айтқанда, зейнеткерлердің тұрғын үйлерін жөндеу, отынын жару, бау- бақша жұмыстарына жәрдемдесу, медициналық көмек көрсету сияқты нақты іс-шараларды жүзеге асыру. Сонымен қатар азық-түлікпен
толтырылған қапшықтар үлестіру, демалыс кештерін, алуан түрлі кездесулер және тағы сол сияқты іс-шаралар ұйымдастыру, бір сөзбен айтқанда, қайырымдылық акцияларын өткізу. «Жас Отан» жастар қанатының бөлімшелері арқылы жүзеге асып жатқан осы игілікті шаралар Алматы, Ақтөбе, Павлодар, Шығыс Қазақстан облыстарында қызу жүріп жатыр. Зейнеткерлерге, соғыс ардагерлері мен қарт мүгедектерге тегін медициналық көмек көрсетілуде. Және бұл жәрдем арнайы құрылған кесте бойынша әлеуметтік жағдайы төмен қарттардың үйлеріне апарып жасалады. Емделуге аса мұқтаж жандарға тегін медициналық квота беріледі. Жасотандықтар қажет болса, пациенттерді емделу гранттарымен қамтамасыз етеді. Осы акцияға қатысушы медициналық колледждің студенттері науқас қарттарға деген көмектерін аямауда. Олар зейнеткерлердің тиісті дәрежеде ем алуын қадағалап отырады. Қазақ әдебиеті, 22.10.2004 3.
