Емтихан кезінде
Әйгілі профессор шетел әдебиетінен емтихан қабылдап отыр. Студенттерге көңілі пәс. Әсіресе мына қызға ренішті. Ол кеңпейіл, мейірімді кісі болғандықтан студент қызға ұрыспады. Әртүрлі сұрақтар қойып қызды жетелеп отыр.
– Бальзактың «Шегрен былғары» (Шагреневая кожа) романы туралы өз ойыңды айтшы, қарағым.
– Мен оны әлі оқып үлгере алғаным жоқ.
– Олай болса, «Горио атай» туралы айт.
– Ол кітап кітапханада жоқ екен.
– Өкінішті, өкінішті, – деді профессор бас шайқап. Қабағы түйіліп кетті.
Ұялды ма, жоқ әлде екілік алып қаламын деп қорықты ма, қыз жылап жіберді.
Профессор абыржып қалды.
– Жә, жә, қой, қарағым. Мен сені қинамай-ақ қояйын, білгеніңді айт. Бальзактың қандай шығармасын оқып едің?
– «Адамзат комедиясын», – деп қыз қуана дауыстап жіберді.
| 
