Жасмин: Қазақстан мемлекетінің туы көк түсті, тудағы дала қыраны – еркіндіктің белгісі. Күн байлық пен берекені білдіреді.
Мақпал: Қазақ елінің елтаңбасында шаңырақ, қос пырақ ат бар. Ат – адамның қанаты. Шаңырақ үлкен ортақ үй деген мағынаны білдіреді.
Мерей: Әнұран – салтанатты ән. Мемлекеттік әнұран егеменді еліміздің туы мен елтаңбасының сазды баламасы.
– Қазақстанның елордасы қай қала?
– Астана қаласы.
– Елбасымыз кім?
– Нұрсұлтан Әбішұлы Назарбаев.
– Біздің Отанымыз, жеріміз туралы қандай тақпақтар білесіңдер?
Ислам: Алтын дәндей даласы бар,
Ақ күмістей қаласы бар.
Неткен сұлу, неткен көркем
Осы менің туған өлкем.
Жәңгірхан: Ен даласын егін жапқан,
Бар баласы бақыт тапқан.
Менің жерім, туған елім –
Күн сәулелі Қазақстан!
Гауһар: Отанды әркім анасындай
Қастерлейді бағалап.
Өйткені Отан баласындай,
Бізді өсірер аялап.
– Өте жақсы, балалар, қазір біз сендермен қызықты ойын ойнаймыз, «Мақалды жалғастыр» деп аталады, мен Отан туралы мақалды бастаймын, ал сендер жалғастырасыңдар.
Отан оттан да (ыстық).
Отан үшін отқа түс, күймейсің, (суға түс, батпайсың).
Отансыз адам – (ормансыз бұлбұл).
Халықтың ортақ үйі – (Отаны).
Ердің көркі елімен, (Отан көркі жерімен).
Отаны бардың (оты өшпес).
Елінен безген ер оңбас, (көлінен безген қаз оңбас).
Отан – қуат, (отбасы – шуақ).
Егемен елдің (еңсесі биік).
Елің – анаң, (жерің – анаң).
Жері байдың (елі бай).
Өз елің – (алтын бесік).
Туған жердің (түтіні де тәтті).
Сергіту сәті: Дөңгеленіп тұрамыз,
Керегені құрамыз.
Айналамыз, айналамыз,
Киіз үйді құрамыз.
– Балалар, бүгін біз сендермен қазақ халқының ғұламалары туралы әңгімелесеміз. Бұрынғы заманда төрелік ететін, билік айтатын ауыл ақсақалын, рубасын, жұртағасын би атаған. Мұндай атаққа ата салтын жетік білетін, ғұлама, шешен, әділ адамдар ие болып отырған. Енді теледидарға көңіл аударыңдар (Билер туралы бейне-слайд көрсету ).
Тәрбиеші: – Бүгін бізге қонаққа данышпандық қасиеттерімен халық қалаулысына айналған Төле би, Қазбек би, Әйтеке би келді. Қарсы алайық!
