Бұл мәселенің компьютердің тілі, техниканың тілі, әуежайдың тілі латын жазуында екендігі сияқты артықшылықтары айтпаса да түсінікті жақтары делік. Бірінші кезекте, латын әліпбиіне көшу – рухани жаңғырудың ең шешуші қадамы. Демек, өз құрамында орыс әріптерін түгел қамтыған 42 әріптік әліпбиден өзгелік дыбыстарды таңбалайтын әріптерді шығарып, өз төл дыбыстарымызды бекемдеп алудың мүмкіндігі. Бұл өз тәуелсіздігіне қол жеткізген кез келген мемлекеттің әдетте қолға алатын бірінші шарасы. Екіншіден, шетелдерде туып өсіп, өмір сүріп жатқан қандастарымыз елдің тыныс-тіршілігімен тыныстап отыра алатын болады. Үшіншіден, әртүрлі жазуда отырған түркі әлемімен де өзара байланыс нығая түсетін болады. Себебі, қазір түркі жұртшылығының көбі латын жазуында, бір-бірімізді оқып түсінісе кету бұрынғыдан гөрі әлдеқайда жеңілдейді. Жаңа әліпбимен жазу-сызуымыз орнықты қалыптасып кетіп жатса, бұл осындай үлкен мақсатта біріктіру функциясын атқаратын болады.
