Ойын. «Мен жақсы оқушымын» Балалардың «оқушы» туралы түсініктерін бекіте түсу үшін ойын әдісін ұсынуға болады. – Балалар, Данышпан ата сендердің жақсы оқушы болғандарыңды қалайды. Ол үшін сендер «Мен жақсы оқушымын» деген жазуы бар алқаны кезегімен тағып тұрып не себепті жақсы оқушы екендеріңді айтып шығыңдар. Мысалы:
– Мен жақсы оқушымын, өйткені сабаққа кешікпеймін. – Мен жақсы оқушымын, өйткені оқу-құралдарымды таза ұстаймын. – Мен жақсы оқушымын, өйткені сабақты жақсы оқимын. – Мен жақсы оқушымын, өйткені тазалықты сүйемін. – Мен жақсы оқушымын, өйткені достарымды жақсы көремін. – Мен жақсы оқушымын, өйткені достарыма көмектесемін. – Мен жақсы оқушымын, өйткені мұғалімді тыңдай білемін. – Мен жақсы оқушымын, өйткені үлкендерді сыйлаймын және т.б.
Осылайша әр оқушы өз ойын жалғастырып айтады. Мұғалім балалардың жауаптарын қорытындылайды: – Жақсы оқушы өздерің айтқандай сабаққа кешікпейді, оқу құралдарын таза ұстайды, тазалықты сүйеді, достарына көмектеседі, мұғалімді, үлкендерді сыйлайды және тыңдайды, тиянақты білім алады. Осы айтылып өткен жақсы қасиеттердің бәрі әдепті адам бойынан табылады.
