Сонда осы позициядағы бар құмалақтарды екі жағы да 9-отауға жинау үшін тақтада қанша жүріс жасайтынын (ең көп) білуге бола ма? Әрине, болады. Жоғарыда айтылған ережені қолдана отырып есептесек, 8-отаудағы бір құмалақ 9-отауға жеткенше бір жүріс жасайды екен. Ал 7-отауындағы бір құмалақ екі жүріс жасайды. Келесі отаудың жүрісі – үшеу т.с.с. болып кете береді. Ал барлық жүрістерді қоссақ, 1+2+3+4+5+6+7+8=36, яғни 36 жүріс жасауға болады екен. Сонымен отауда жатқан бір құмалақты қайта-қайта жүргенде, оның барлық жүрістерінің саны, соңғы құмалақтар жинайтын отауға жеткенше қанша отау болса, сонша жүріске тең.
Отауда жатқан екі құмалақтың барлық жүрістерінің санын табу үшін, жүрісті жүретін отау мен құмалақтар жинайтын отаудың арасындағы отаулар санын отаудағы құмалақтар санына (бұл жерде екіге) көбейтсек болғаны. Мысалы 5-отауда жатқан (№17 – диаграмма) екі құмалақ 9-отауға жеткенше 4 рет қарғиды екен, яғни ол екі құмалақ (4х2=8) сегіз жүріс береді. Екінші отауда жатқан 2 құмалақ 9-отауға жеткенше (7х2=14) он төрт жүріс береді т.с.с.
