Математиканы оқыту әдістемесіне сипаттама

«Әдістеме» - гректің «жол» деген сөзінен шыққан. Математиканың әдістемесі (немесе математиканың дидактикасы не педагогикасы деп те айтылады) - қоғамның талабы бойынша, оқыту мақсаттарына сәйкес, математика ғылымының белгілі бір даму деңгейінде математиканы оқыту заңдылықтарын зерттейтін педагогиканың бір тарауы.

Математика әдістемесі математиканы оқытуға байланысты негізгі үш сұраққа жауап береді:

1. Математиканы неге оқытамыз?

2. Математикадан нені оқытамыз?

3. Математиканы қалай оқытамыз?

Адамзат өзінің мыңдаған жыл болмысында білімге үлкен жол салды, әлемнің ғылыми кескінін құрды, ғылыми жаңалықтарды практикада кеңінен қолданды. Онымен шектелмей математиканың көмегімен күннен – күнге нақты өмірдің сыры мен қыры зерттеліп отыр. Математика табиғи құбылыстарды зерттеуде, әртүрлі практикалық проблемаларды шешкенде, ғылымның барлық салаларында қолданылатыны белгілі. Математиканың әрбір тақырыбын оқығанда оның практикадағы қолданысын анықтап отыру арқылы математиканы оқытудың себебі айқындалады.

«Математикадан нені оқытамыз?» - деген сұрақтың жауабы мектеп курсы математикасының мазмұнында (бағдарламаларда және оқулықтарда ) келтірілген.

«Математиканы оқыту теориясы мен әдістемесі» пәнінің мазмұны «Математиканы қалай оқытамыз?» - деген сұрақтың жауабын құрайды.

Ең алғаш математика әдістемесі 1803ж. швейцар педагогы Г.Песталоццидің (1746-1827жж.) «Сандар туралы көрнекі ілім» еңбегінде шықты.

Ал, математика әдістемесі, ғылыми пән ретінде XIX ғасырдың басынан есептелді. Математика ғылымы мен мектеп математикасының арасында айырмашылықтар болғандықтан және математика әдістемесі педагогиканың философиясымен, математикамен, логикамен, психологиямен, биологиямен, кибернетика және өнермен байланыс шекарасындағы ғылым болғандықтан математика әдістемесінің даму процесінде қиыншылықтар болды.

«Математиканы оқыту әдістемесі» пәні шартты түрде үш бөлімге бөлінеді:

1) математиканы оқытудың жалпы әдістемесі (мысалы, оқыту әдістері);

2) математиканы оқытудың арнайы әдістемесі. (мысалы, мектеп курсы математикасында функцияны оқыту);

3) математиканы оқытудың дербес әдістемесі (мысалы, VII сыныпта математика сабағын жоспарлап, «Векторлар» тақырыбын оқыту әдістемесі).