Нақты нәтиже алу үшін лампадан әрбір қашықтықтағы көпіршіктердің санын 3 рет қайталап есептеу.
Тәжірибе нәтижесін талдау барысында болжамның дәлелденгені туралы қорытынды жасауға болады. Жинақталған дәлелдерге сүйене отырып, сынауықтың жоғары жағындағы түзілген көпіршіктердің санына лампа мен су өсімдігі бар сынауықтың арақашықтығы әсер етеді деп тұжырымдауға болады. Лампа сынауыққа жақын орналасқан сайын (20 см ден 5 см дейін), 60 секунд ішінде түзілген көпіршіктердің саны да көп болды (9-дан 55 көпіршікке дейін). Оттегі көпіршіктері фотосинтездің өнімі болғандықтан, көпіршіктер көп түзілген сайын, фотосинтездің жылдамдығы да артады деп қорытынды жасауға болады. Фотосинтез қарқындылығы, жарық қарқындылығына байланысты, себебі лампаға су өсімдігі бар мензурканы жақындатқан сайын жарық қарқындылығы артып, оттегі көпіршіктер санының көп болуы фотосинтез жылдамдығының жоғарылауына дәлел болады.
№6 зертханалық жұмыс
Зертханалық жұмыс «Түрлі концентрациялы тұз ерітінділеріндегі жасушалардың су потенциалын анықтау»
Жасушаны құрайтын бейорганикалық заттардың ішіндегі ең маңыздысы – су. Ағзалардағы барлық физиологиялық үрдіс су арқылы жүреді. Мысалы, өсімдіктерде судың тасымал жүйесі, транспирация, т.с.с. судың потенциалдар энергиясы негізінде жүзеге асады.
Су потенциалы – жүйеде судың еркін кинетикалық энергиясының көрсеткіші. Су потенциалы ешқашан оң болмайды, бірақ атмосфералық қысымдағы таза судың мәні нөлге тең болады. Суда қант немесе тұз кесектері еритін болса, онда оның мәні 0-ден теріс мәнге өзгереді.
Егер жасушаны су потенциалы жоғары аймаққа орналастырса (гипотониялық ерітінді), белгілі бір уақыттан кейін жасуша ісінеді. Керісінше, жасушаны су потенциалы төмен (гипертониялық ерітінді) ортаға салса, жасуша протопласты жасуша қабырғасынан сығылады, ал сыртқы аймақтың су потенциалы (изотониялық ерітінді) мен жасуша ортасының су потенциалы тең болса, жасуша өзгеріссіз қалады.
Тірі өсімдік жасушасындағы осмос үрдісі негізінде су потенциалын зерттеу үшін бірнеше зертханалық жұмысты орындауға болады.
